出了名的預約困難店，每月1號開放下個月的訂位，本來都無訂到位的期望，有朋友竟然1號去餐廳排隊預約，拉衫尾攞到兩個位。
被安排坐在吧台位，看一看餐牌，omakase $1480 up, 需要兩日前預訂，基本壽喜燒套餐 $680, 包含前菜，茶碗蒸，A4 和牛4塊，野菜同甜品，老實講價錢唔貴。仲有幾個升級 option, 可以轉A5 和牛，北海道仙鳳趾生蠔，牛舌等，我地叫了兩個套餐，加一份牛舌 ($100/4塊），一杯啤酒同highball。
落好單後好快就上前菜，煙三文魚，三文魚籽，金時蕃薯，同吞拿魚絲野菜。
本菇舞茸菇蒸蛋，呢個組合幾特別。
到主角壽喜燒出場，4片牛肉分別為肉眼，西冷，兩個部位的牛肩，最後有我們追加的牛舌，肉味由淡至濃。
sukiyaki Mori 主打關西風壽喜燒，師父先用牛油開鍋，放幾片大蔥，洒上日本砂糖，然後煎牛肉，再淋上壽喜燒醬汁，師父解釋日本砂糖甜度較低，主要是為製造焦糖化的效果，日本正宗做法會使用日本和三盆糖，類似糖霜般幼細的糖，實際效果要留待去日本食過再比較。
牛肉和蔬菜會輪流煎，而白飯也可以任加，不過之後會有一個滑蛋牛肉蓋飯，所以白飯都要盡量忍手。
牛肉方面肉眼油脂最濃，肉味就稍弱，第一件食落口有點膩。西冷比較lean肉味同油脂平衡。而第一件牛肩油脂較多，肉質有點鬆散。到最後一塊牛肩，油花最為平均，牛味重之餘油脂感也好強，最為balance, 入口回甘久久不散。兩塊牛舌煎完洒上蔥花，味道都好濃厚。個人認為A4 和牛已經好足夠，未需要upgrade 去A5, 只係師父手勢牛肉偏生，未做到好焦糖化效果，口感偏向油膩。
食完燒肉後，師父即席整了一個滑蛋牛肉蓋飯。之前的白飯真係要留肚，不算太驚豔，但係好滿足既。
最後上埋甜品，北海道牛乳奶凍啤梨和蕨餅。
因為只有三位師父，全店無論坐吧台還是卡位都是師父即席烹調，所以係坐唔滿同埋都幾趕，平均只有一個鐘頭。
Sukiyaki Mori
66 Hollywood Road, Central
Comments
Post a Comment